فهرس المحتوى
اذا عاوز تعرف ليه الإنحياز للسلطة Authority bias بيخلي الناس تطيع بدون حتى ما تعرف صحة الكلام من عدمه فاقراء التدوينة دي
دي أمكن تكون أهم تدوينة توريك يعني شنو الإنحياز للسلطة و كيف تستفيد بي معرفتك ليه و تشوف أمثلة عليه في حياتك
تعريف الإنحياز للسلطة Authority bias
هو الميل الى النظر أن رائ السلطة هو الأكثر دقة و صحة (لمجرد أنه نابع من السلطة) دون النظر لمحتوى الرأي، و يكون الشخص المتحيز أكثر تأثرا بالسلطة من غيره
بلغة ابسط ..
الناس بتميل لانو يكون عندهم ثقة كبيرة جدا و غير معقولة أو إيمان ان المعلومات النابعة من شخص أو كيان عنده سلطة رسمية أو حتى غير رسمية صحيحة بغض النظر عن محتواها
بيعتقد انو معلوماتهم و أوامرهم صحيحة بسبب سلطتهم بس و عشان هو متأثر بسلطتهم ما متأثر بصحة المعلومة أو الراي
و ذي ما بنتكلم عادة الانحياز المعرفي في نفسه ممكن يسبب خطاء في اتخاذ القرارات راجع اول انحراف كتبت عنه و هو انحراف دانينج كروجر المعرفي
مظاهر إنحياز السلطة في الحياة اليومية
![محطة ترامفاي يوسف باشا اسطنبول](https://www.ahmedezzalldeen.com/wp-content/uploads/2024/03/محطة-ترامفاي-يوسف-باشا-اسطنبول.jpg)
في محطة الترام في منطقة يوسف باشا في أسطنبول كنت أنا و زوجتي ماشين بالمساء بعد خلصنا سياحتنا في اليوم داك و ماشين البيت.
كنا مستعجيلين لانو بليل الدنيا باردة و برضو تعبانين و عاوزين نصل بسرعة عشان نرتاح
لاقانا واحد من بتاعين شركات السياحة و حاول يدينا أوراق عن أماكن سياحية نزورها و كان واقف ورا استاند حديد كدا شكله قديم و شين
طبعا منطقة يوسف باشا و أكسراي دي منتشرين فيها بتوع السياحة كتير و حتى منها بتنطلق الباصات السياحية الماشة كل الاماكن القريبة على اسطنبول زي يلوا و بورضا و صبنجة و المعشوقة و غيرهم
كنت انا على الاقل حاسي انو دا زول بس بتاع اعلانات و ممكن يغشنا بي كلامه عادي و ما كان عندي ثقة فيهو نهائي
لكن .. قلت اسمعه على كل حال و نشوف المعلومات البقولها
الزول سرد لينا كم عرض ممتازين كدا و لكن كان مصر اننا ننزل معاه المكتب السياحي و نحن مستعجلين ما عاوزين نمشي
لكن لسبب ما اقتنعنا و مشينا على بعد خطوات بسيطة
المهم المكتب كان واسع و جميل جدا و حاجة كدا أخر قيافة و زولنا قعد في كرسي المدير ذي السلام عليكم
تشربوا شنو شاي ولا قهوة ولا كبتشينوا؟ لا شكرا مستعجلين
المهم في المكان داك سالناهو من الحاجات الكانت في نفسنا و خفنا نقولها ليوه قبيل عشان ما عاوزين نخلي يشعر شعور ما كويس
مجرد وجودنا في المكتب و جلوس الزول دا في محل المدير ادانا ارتياح لتصديقة أكتر و وثقنا فيه اكتر
و مع نهاية الحوار دفعنا ليهو مقدم الرحلة و اتفقنا على اساس نمشي الرحلة مع شركتهم
أمثلة غير دي كتير ممكن اوضحها ليك
الناس بتطيع أوامر رجل المرور أو اي عسكري لمن يكون في زحمة سيارات و يكون عاوز يحل المشكلة، بينما لو جاء زول لابس ملابس مدنية ما حيسمعوا كلامه
إعلانات معجون الأسنان دايما بجيبوا فيها دكتور لابس لابكوت عشان الناس بتثق في كلامه
لماذا يتأثر الناس بإنحياز السلطة بسهولة؟
الحاجة دي بتحصل تلقائيا كدا
الأبحاث السلوكية في الزمن دا بتتكلم عن وجود قسمين من العقل، عقل لا واعي و دا بيعمل اشياء بصورة تلقائية من ضمنها التنفس و ردة الفعل السريعة لاي طاري و هكذا
و عقل واعي و دا بيتخذ القرارات البتحتاج لي تحليل و تفكير منطقي
و الإنحياز السلوكي دا بيحصل غالبا من العقل الباطن
برضو العقل عموما كسول و ما عاوز يتعب و يفكر كتير بطبعه و الإستماع لسلطة عليا بسهل عليك إتخاذ القرار بدل تبحث و تصل للصواب بنفسك
و دا طبعا شي بقدر ما هو كويس في بعض المواضع بقدر ما هو ضار في حتات كتثرة
ظهروا في تقديري بسببه في الأمة الاسلامية المقلدين و ديل السلطة حقتهم حاليا هي الفتاوى أو اللجان العليا للفتوى أو الشيوخ قالوا
و قبل وقتنا الحالي دا ظهروا بسببهم المذاهب الاربعة أو الخمسة اذا حسبت المذهب الظاهري
و ظهرت بسببه الفرق و المتصوفة و عدد من الجماعات المنتمية لمدارس محددة و للأسف مقلدين تقليد أعمى
و نحن في الأسلام علينا فقط بإتباع أوامر الله عز و جل و الرسول عليه أفضل الصلاة و السلام
فقال جل من قائل: {وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ} [الأحزاب:٣٦]،
و قال جل من قائل: {فَلا وَرَبِّكَ لا يُؤْمِنُونَ} [النساء:٦٥]،
و هنا أكد بمؤكدات ثلاثة، {فَلا وَرَبِّكَ لا يُؤْمِنُونَ حَتَّى يُحَكِّمُوكَ فِيمَا شَجَرَ بَيْنَهُمْ ثُمَّ لا يَجِدُوا فِي أَنفُسِهِمْ حَرَجًا مِمَّا قَضَيْتَ وَيُسَلِّمُوا تَسْلِيمًا} [النساء:٦٥].
و المشكلة انو المقلدين مهما كانت طائفتهم بيتبعوا الناس بطريقة عمياء و بس عاوزين النتيجة النهائية بسهولة و مدام السلطة العليا دي قالت كدا خلاص بدون تفكير في ما قالته السلطة بيسمعوا كلامهم و يتأثروا بيه
سبب تاني بخلينا نتأثر بي الإنحياز للسلطة هو التربية و الثقافة
مما قام الشخص فينا بيتعلم في المدرسة الطاعة للاستاذ و الطاعة لي أولياء الامور
و يتم تخويفه من الناس الكبيرة و انو يسمع الكلام و دا كله بدون التفريق في متى تطيع و متى ما تطيع
و سبب تالت كمان أنو في العادة السلطة بكون عندها وصول لمعلومات و تجارب و حكمة و غيره ما عند الشخص العادي و دا بخلينا نثق في أنها بتقدر تتخذ القرارات الصحيحة أفضل مننا
أخيرا و ما عاوز اتوسع أكتر من كدا الناس بتنصاع للسلطة عشان ما تخالف الجماعة، لأنو مخالقة الجماعة ممكن بسببها يحصل للشخص خذلان من الجماعة بالهجر مثلا أو عدم الحصول على المنعة و القوة
مثال واضح لي دا إنحياز الشحض لقبيلته و أنحياز الناس لدولتهم و وطنيتهم المبالغ فيها و الأنحياز لفريقهم المفضل مع المشجعين بتاعين الفريق و الأنحياز لحزبهم السياسي و هكذا
بسبب التأثير دا بتحصل مجازر و ناس تموت بسبب الإنصياع لأوامر السلطة العليا بدون التفكير فيها
عشان كدا دا بقودنا للعنوان الجاي عن تجربة ملغرام
تجربة الطاعة للعالم استانلي ملغرام
![تجربة ملغرام للطاعة و الإنحياز للسلطة](https://www.ahmedezzalldeen.com/wp-content/uploads/2024/03/تجربة-ملغرام-للطاعة-1024x718.jpg)
العالم أستانلي ملغرام كان عاوز يعرف هل الجنود بتاعين هتلر العملوا مجازر الهولوكوست عندهم ذنب في طاعتهم للسلطة
ولا فقط هم جاتهم أوامر و ينفذوها و هم ما بيدهم حيلة
التجربة بتاعت ملغرام كانت سنة 1961م تحت مظلمة علم النفس الإجتماعي
تمت في جامعة ييل Yale University الأمريكية
كان ملغرام غاوز برضوا يتاكد من مدى إنصياع الناس للسلطة
التجربة تتلخص في الأتي:
طاعة سلطة العالم صاحب التجربة مقابل طاعة سلطة الضمير الإنساني
الضمير الإنساني بحدثك أنك ما تاذي الأخرين طبعا أما العالم و الباحث البيعمل التجربة حيدي أوامر للشخص ان يعمل شي يخالف ضميره و هو تنفيذ صعقة كهربائية على الضحية
طريقة تجربة الطاعة لملغرام
جابوا في التجربة كمية من الناس من طبقات مختلفة من المجتمع ، علماء عندهم درجات علمية و اصحاب مهن و حرف و ناس ما دارسة و غيرهم يعني مختلف فئات المجتمع
عشان تفهمني بالساهل عاوزك تعتبر نفسك واحد من الناس دي و انو حنجرب عليك التجربة دي
حتجينا حرم الجامعة و تخش محل اللاب
و حنوريك انو عندنا تجربة علمية خاصة بتأثير العقاب على التعليم و الذاكرة
و هي انو هل العقاب بيأثر على ذاكرة الشخص و يحفذها ؟
بيجي مدير التجربة و يسلم عليك و هو لابس اللابكوت بتاع الدكاترة و العلماء
و حيسوقك معاه لشخص تاني من نفس الناس الاخترناهم فوق من فئات المجتمع الذكرتها ليك
و بعرفوك عليه و بوروك انه دا حيكون المتعلم و انت حتكون الاستاذ
حتسال الزول دا عدد من الاسئلة و مع كل سؤال اذا جاوب صح ما بتعاقبه و لكن اذا جاوب غلط بتدوس زر بيضرب الشخص دا بي صدمة كهربائية
كل مرة لمن تسال و هو يخطئ في الاجابة مقدار الصدمة الكهربائية الانت مفروض تضربها ليو بتزيد لحدي ما تصل الدرجة الاخيرة و اللهي عالية جدا جدا طبعا
المتعلم بكون في غرفة و انت و المدير بتاع التجربة العالم بتكونوا مع بعض في غرفة
انت حتكون فاكر انو التجربة عن موضوع التعليم و الذاكرة لكن التجربة في الحقيقة عليك انت شخصياً و على مدى طاعتك لمدير التجربة
طبعا الزول التاني و مدير التجربة ممثلين و ما ليهم اي علاقة بالعلم ولا بالجامعة ولا شي
و انت ما عارف كدا طبعا
فلمن تبداء تسال و الزول يغلط و انت تضربه في الاول حتكون الضربة تاثيرها بسيط و الشخص التاني حيكورك بصوت بسيط
فانت ما حتتاثر
بعد كم اجابة خطاء حتكون انت وصلت لانك تعذب الشخص عديل كدا بالصعقات الكهربائية دي و ضميرك ممكن يبداء يانبك
و حتسمع الزول في الغرفة التانية بكورك و بستنجد انو وقفوا التجربة دي انا ما عاوز اواصل
فهل يا ربي حتواصل التجربة لحدي النهاية ولا ضميرك حيوقفك؟
تفتكر نسبة الناس الوقفت عن طاعة مدير التجربة و هو بيامرهم يخالفوا ضميرهم حتكون كم؟ 80% ولا 90%
طبعا اخبروا بالتجربة دي كمية من العلماء و طلبوا منهم يدوا رائيهم انو كم بالمية من الناس ممكن يصلوا في تعذيبهم للضحية لحدي ما يصلوا للدرجة الاخيرة؟
تعرف راي العلماء كان شنو؟
قالوا أقل من 0.1% من كمية الناس حيصلوا للصعقة النهائية
دي كانت التوقعات
تخيل النسبة دي صغيرة قدر شنو يعني من كل الف شخص فقط شخص واحد فقط بيصل للدرجة القصوى من الصقعة الكهربائية
فانت رايك شنو؟؟؟
النتيجة يا صديقة … انو حوالي 65% من المشاركين وصلوا للصعقة النهائية
شوفت كمية الناس الاتاثرت بسلطة العالم دا قدر شنو
شوفت كمية الناس الممكن تشوف اصحاب السلطة و تطيعهم فقط عشان سلطتهم قدر شنو
شوف ربنا عز و جل حكى عن الناس السبقونا : “اتخذوا أحبارهم ورهبانهم أربابا من دون الله والمسيح ابن مريم وما أمروا إلا ليعبدوا إلها واحدا لا إله إلا هو سبحانه عما يشركون”
حتى ديل الحاجة الحللوها ليهم احبارهم و رهبانهم حللوها لنفسهم و الشي الحرموا حرموه لنفسهم فسبحان الله
تاثير السلطة تاثير عالى و قوي جدا
و بالمناسبة المدير بتاع التجربة كل ما زول كان بقول ليهو ما عاوز اواصل عاوز اقيف كان رده بسيط جدا
كان بقول: التجربة تتطلب انك تكمل و تضرب الصعقة الكهربائية التالية
كان بقول : واصل التجربة
كان فقط بيدعوهم
شوف ربنا عز و جل ذكر لينا في القران الكريم قصة الشيطان عليه لعنة الله ﴿ وقال الشيطان لما قضي الأمر إن الله وعدكم وعد الحق ووعدتكم فأخلفتكم وما كان لي عليكم من سلطان إلا أن دعوتكم فاستجبتم لي فلا تلوموني ولوموا أنفسكم ما أنا بمصرخكم وما أنتم بمصرخي إني كفرت بما أشركتمون من قبل إن الظالمين لهم عذاب أليم ﴾ [ إبراهيم: 22]
أنصحك تشوف الفلم الوثائقي للتجربة دي لانو صراحة مثير و مشوق جداَ
دا رابط لتجربة ملجرام على اليوتيوب ممكن تحضر من هنا أو تحضر الفلم الوثائقي اسمه الطاعة Obiediance
في فلم برضو اتعمل للتجربة و بتصوير و شغل احترافي اكتر اسمه Experimenter ممكن تبحث عنه و تحضره برضو
انحياز السلطة مع تغيير بعض الوضعيات و الاحوال
في تجارب اضافية اتعملت عشان تفصل اكتر في موضوع الانحياز المعرفي دا
عاوزين يشوفوا لو تم تغيير بعض الظروف هل دا ممكن ياثر في مستوى الطاعة
مثلا:
لمن كان في علاقة مباشرة بين الضحية و بين الشخص، مستوى الطاعة للسلطة كان قليل بسبب العلاقة دي
و بالعكس كمان
لمن كان في علاقة مباشرة بين الشخص و صاحب السلطة، مستوى الطاعة للسلطة كان زايد جدا
عملوا برضو اختبار على مسالة تقسيم العمل
يعني زول يسال الاسئلة و زول تاني يدوس الزر بتاع الصعقة الكهربائية و زول يدي الامر و هكذا يعني تم التقسيم
دا اتسبب في زيادة مستوى الطاعة للسلطة الرئيسية
الظاهر السبب انو كل شي بشوف كدا انو هو برئ من المسئوولية الكاملة عشان كدا بيطيع السلطة العليا عشان يمشي اموره في الاخير هو ما مسائل
ختام و ملخص انحياز السلطة المعرفي
الانحياز للسلطة انحياز معرفي مؤثر جدا و خطير و بما انك عرفت المعلومات القيمة دي عنه فلازم تحذر التحيز دا
في الحياة اليومية و في اتخاذ قراراتك لازم تراجع سلوكياتك و تنتبه انك ما منساق زي القطيع وراء اي سلطة ساي
في موضوع التسويق الالكتروني او على اي ميديا لازم تعمل ليهو حساب
باي طريقة حاول اصل لي اظهار سلطة معينة Authority لانو دا بخدمك انو الناس تثق في رسائلك و انو تطيع طلبك بسهولة
في وسائل ممكن تتحصل بيها على السلطة دي و لكن دا ما مكان ذكرها هنا
و اتعلم من المثال الكتبته ليك في اول المقال و كيف المسوق داك قدر يجذبنا و يمارس علينا السلطة دي لحدي ما اشترينا منه التذاكر
أدرس برضوا عن انحيازات فكرية تانية و حاول أجمع البتقدر عليه في رسائلك التسويقية لانو تأثير واحد افضل من لا شئ و تأيثرين أفضل من واحد و هكذا
اقراء عن الانحياز المعرفي لاحترام الاسباب و تجربة الة الطباعة
أخيراَ،
انا نيابة عن استانلي ملغرام حجاوب عن سؤاله الاول انه هل الجنود العملوا الهلوكوست مع هلتر كانو مجرمين كمان
حقول ليهو ربنا عز و جل قال: “فَالْتَقَطَهُ آلُ فِرْعَوْنَ لِيَكُونَ لَهُمْ عَدُوًّا وَحَزَنًا ۗ إِنَّ فِرْعَوْنَ وَهَامَانَ وَجُنُودَهُمَا كَانُوا خَاطِئِينَ (8)” القصص
إنما الطاعة في المعروف و لا طاعة لمخلوق في معصية الخالق
و الله ولي التوفيق
و السلام عليكم و رحمة الله