فهرس المحتوى
- 1 ما هو تأثير دانينج كروجر و هل هو إنحياز المعرفي فعلاً؟
- 2 كيف تم معرفة تأثير دانينج كروجر و تأكيد انه من الإنحيازات المعرفية
- 3 قصة حرامية البنك و الإختفاء عبر عصير الليمون
- 4 طريقة البحث و تاكيد ظاهرة دانينق كروجر
- 5 دراسات أخرى بتأكد انحراف دانينج كروكر المعرفي ( تأثير دانينغ كروجر )
- 6 هل فعلا تأثير دانينج كروقر حقيقي و منطقي
- 7 الميتاكوقنيشن (الإدراك) و وهم التفوق
- 8 كيف أستفيد من تأثير دانينج كروجر و إنحيازه المعرفي في التسويق
السلام عليكم و رحمة الله
عاوز تعرف ليه الشخص الغبي ممكن يكون عنده ثقة في نفسه عالية جدا بالرغم من غباءه؟
الموضوع بتاع اليوم بهمك شديد عشان ما تكون من الفئة دي من الناس و تعرف كيف ما تكون متحيز لي نفسك بلغلط
في عصرنا الحديث دا اقرب علماء درسوا الظاهرة دي بطريقة علمية هم ديفيد دانينغ و جستن كروجر و الاسم بتاع الانحياز المعرفي دا من اسمهم
أقراء للنهاية لأنو في كم معلومة حتستغرب منها جداَ ..
السبب الأساسي في الظاهرة دي حاجة اسمها تأثير دانينغ كروجر .. فشنو هو انحياز دانينج كروجر؟
ما هو تأثير دانينج كروجر و هل هو إنحياز المعرفي فعلاً؟
هو سلوك نفسي في طبع الإنسان في الغالب ان الشخص الجاهل أو غير الكفؤ بكون عنده ثقة في قدراته أكتر من اللازم
و ايضا أنو الشخص الخبير جدا تقديره لثقته بنفسه في كفائته بتكون أقل من هو عليه.
و ذي ما بقول الشاعر المتنبئ:
ذو العقل يشقى في النعيم بعقله … و أخو الجهالة في السعادة ينعم
المتنبي
كيف تم معرفة تأثير دانينج كروجر و تأكيد انه من الإنحيازات المعرفية
بداء الدراسة دي دانينج و كروجر في سنة 1999م .
في قصة عجيبة جدا قالوا انها اثرت في العالمين ديل انهم يبحثوا الموضوع دا و يعرفوا شنو البخلي زول ما عالم يكون واثق من إمكانياته و معرفته للدرجة دي
أنا صراحة ما قادر اصدق صحة القصة دي نهائيا .. و لكن تواترت عنها الأخبار كتير
قصة بتخليك تتعجب كتير من سلوك البشر
قصة حرامية البنك و الإختفاء عبر عصير الليمون
في 6 يناير سنة 1995 في شخصين مشوا سرقوا بنك في أمريكا في مدينة بيطسبيرق Pittsburgh شخص اسمه
McArthur Wheeler (ماك وييلر ) و التاني أسمه Clifton Earl Johnson (كليفتون ايرال جونسون)
![ماك ويلر و هو بيسرق البنك بعصير الليمون](https://www.ahmedezzalldeen.com/wp-content/uploads/2023/11/ماك-ويلر-و-هو-بيسرق-البنك-بعصير-الليمون.jpg)
المهم ..
الجماعة ديل لمن سرقوا البنك ما كانوا لابسين اي اقنعة و ما اخفوا هوياتهم بالعكس حتى واحد فيهم كان بعاين في كمرات المراقبة و بيضحك ليها كمان
ثقة شديدة في الحاجة البيعملوها
سرقوا و هربوا و امورهم ظابطة لكن ….
اكيد حتفتكر انو الحرامية ديل محترفين او حيختفوا بطريقة معينة او انو في شي في مقدروهم يعملوا … اي حاجة
لكن لا
كلها كم ساعة كدا و قبضوا الاول و تاني كم يوم و قبضوا التاني عاااادي زي الزبادي
و لمن قبضتهم الشرطة
كان الحرامية ديل متفاجئين انو كيييييييييف الشرطة اتعرفت عليهم
تخيل بس
انتو ما كنتو ما لابسين اي قناع و ما اخفيتوا نفسكم؟؟؟؟
قالوا والله نحن كنا خاتين عصير ليمون في وشنا لكين؟ و عصير الليمون دا مفروض يخفي هويتنا و ما تشوفونا!!
ههههههه
طبعا خش الرابط دا و استمتع بالضحك و التعليقات المستهترة في الحاجة القالوها دي
دي نمازج بسيطة من استهتار الناس بفكرتهم دي
و لكن طلع الفكرة دي جابوها من شخص درسهم انو الليمون بيخفي الحبر على الورق و لمن شافوا كدا قالوا خلاص معناها نخفي نفسنا عن طريق مسح عصير الليمون في وشنا …
و حدث ما حدث ……………………………………………………..
شمس الدين كباشي
طريقة البحث و تاكيد ظاهرة دانينق كروجر
الباحثين ديل كانوا شغالين في جامعة كورنيل الامريكية Cornell University و استخدموا في البحث بتاعهم عينات من الطلاب
كان بيسالوهم أسئلة بسيطة قبل ما يخشوا الامتحانات
كيف انت شايف نفسك أديت في الامتحان دا؟ أو كيف حتكون نتيجتك في الامتحان؟
و بيطلبوا منهم الاذن في انو يشوفوا النتيجة بعد الامتحان يظهر طبعا
طبعاَ الطالب هنا ما عارف النتيجة لسه فبيقوم يقيم نفسه بنفسه!
و عملوا مقارنة بي الدرجات أو الاداء المتوقع للطلاب و بين النتيجة الحقيقية
الرسم البياني دا بيوضح ليك كيف طلعت النتائج
الطلاب الادائهم متدني و تعبان … كانوا متوقعين نفسهم يطلعوا بنتائج افضل و ثقتهم درجتها عالية
لكن كلما الطلاب كان ادئهم احسن بتلقى انو تقديرهم لنفسهم انهم درجاتهم حتكون اعلى شوية اقل
اتخيل بس
و للاسف دا سلوك كتير جدا من البشر ، عشان كدا ما تتغش بأي زول تشوفه نافش ريشه و تحسه واثق من نفسه
برضوا كمان
الطلاب اصحاب احسن اداء كانوا متوقعين لنفسهم دراجات او نتائج أداء اقل و دي برضها حاجة لازم ننتبه ليها
دراسات أخرى بتأكد انحراف دانينج كروكر المعرفي ( تأثير دانينغ كروجر )
دانينج و كروجر لمن عمولوا دراستهم في الأول كانت بتشمل نوعية معينة من المعارف
كانوا مركزين على تقييم الشخص لنفسه في مجال قواعد اللغة و التحليل المنطقة و المهارات الإجتماعية
بعدها الناس اتوسعوا شوية أكتر لدراسات تشمل البزنز و السياسة و الطب و غيرهم
أنا شخصيا شد انتباهي و ضحكني جداَ جدا دراسة السواقين
أتخيل انو عملوا دراسة على كمية كبيرة جدا من سواقين العربات
السؤال تقريبا كان :
هل أنت شايف نفسك ضمن أحسن 5% من السواقين في امريكا؟
أكيد المتوقع انو اذا كان كل شخص بقيم نفسه صح و صادقين انو يكون 5% من الناس تقول ايوا انا من ضمن الاحسن ديل و البقية يقولوا لا … انا ما من ضمنهم
لكن النتيجة صاااااااادمة صراحة .. زيها و زي نتايج كتيرة بتاعت دراسات في علم النفس حتقراها في المدونة دي إن شاء الله
تقدر تتصور أنو ما 10% ولا 20% ولا 40% ولا ولا ولا بل 88% من الناس قالت نحن من ضمن احسن 5% من السواقين في البلد
و دا طبعا أصلا غير ممكن و معناها نسبة كبيرة جدا من الناس شايفة نفسها أحسن و ثقتها في نفسها اعلى من المفترض
فلاااااااازم انت تميز بين الناس ديل منو الفعلا هو قدر كلامه … و قليل ما هم!
هل فعلا تأثير دانينج كروقر حقيقي و منطقي
في رسم بياني منتشر على الإنترنت بيتكلم عن النوعية دي من السلوك و بقولوا أنها لدنينج كروجر لكن حقيقة انا ما لقيت ليها مرجع معين أو أساس دراسي
عموما ما شايف في باس من انو تلاحظها معاي لانو في الواقع الرسم البياني منطقى و مقنع من العقل و من المشاهدة
الرسم دا بسيط جدا و ما محتاج اشرحه الا قليل
في البداية تعلم الشخص لاي مجال بكون متعجرف و شايف نفسه و فاكر انو اخطر زول في الكوكب فثقته بنفسه بتكون في اعلى نقطة ..
بسموها جبل الغباء هههه و لكن أن تتخيل
بعد ما يعرف انه ما كان عارف كتير فمستوى الثقة في النفس بينقص لحدي ما يصل نقطة منخفضة جدا تكاد تكون قريبة من الياس
مع ممارسة التعلم و ومواصلة الطريق بيصل للمعرفة البتزيد ثقته في نفسه تاني و في قراراته و لكن …
و لكن
ما بيصل في مستوى التاكد و الثقة لنفس درجة المبتدئ الما عارف نفسه
و دا بيقودنا للنقطة التالية
الميتاكوقنيشن (الإدراك) و وهم التفوق
جزء من تحصيلك للمعرفة انك تتعلم كيف تفرق أو تقييم الأداء الجيد من الكعب للمهارة أو المعرفة المعينة
يعني بطريقة أبسط
جزء من العلم انك تعرف انت في مستوى من العلم أصلا
و دا بيسموهوا الميتاكوقنيشن Metacongnition ادراك الأدراك
ممكن نقول انو السلوك دا بينتج من عدم إدراك الإدراك
يعني لازم يكون عندك قدرة في معرفة إمكانياتك الذاتية
و دا نفسه جزء من المعرفة
فلو انت ما مدرك لي كمية معرفتك و عارف مستواك وين بالضبط فالإحتمال كبير جداً انك تخطي في تقدير امكانياتك
و دا حيأثر طبعا في قراراتك و ممكن بسببه تحصل ليك مشاكل لا قدر الله
فإن كنت لا تدري فتلك مصيبة … و إن كنت تدري فالمصيبة أعظم
إبن قيم الجوزية
كيف أستفيد من تأثير دانينج كروجر و إنحيازه المعرفي في التسويق
أول شي كونك الان عارف المعلومة دي فدي خطوة اولى كويسة
تشوفها في نفسك و تعيد تقييم نفسك بطريقة صحيحة عشان ما تعمل قرارات خطاء
الشي التاني
ما تنخدع بي أي شخص بيتكلم بثقة عالية و خاصة اذا كان لاحظت من فلتات كلامه انه جاهل بما يقول و بيثرثر كتير لما لا يفقه
و في نفس الوقت انتبه للزول الصادق في كلامه و ملم بي مجاله لكن ما واضح عليه ثقة كبيرة في الكلام لانو دا ممكن يكون كنز بالنسبة ليك
في التسويق لازم تعرف انو الناس بتتابع الشخص الذي يبدوا عليه انه واثق جدا في نفسه و في كلامه
فخلي في الحالة دي التسويق بتاعك و الخطاب بتاعك فيهو ثقة كبيرة جدا عشان الناس تسمعك
و بالتوفيق يا صحبي و ان شاء الله نلتقي في بوست قادم