كيف اصبح مصمم جرافيكي في 10 خطوات فقط و أكسب منها فلوس على الإنترنت

السلام عليكم في بودكاست اليوم ركن نقاش حنتكلم عن كيف تصبح مصمم جرافيكي محترف. فاذا كنت مهتمي انو تصل مرحلة مميزة في التصميم و تكسب منها قروش على الانترنت فاحضر و تابع البودكاست دا.

ضيفي اليوم الاخ عبد الله حسين من فلسطين، مصمم جرافكس على الانترنت و خبرته قريب 8 سنوات في المجال و بداء على الانترنت من الصفر. و الان عبد الله عنده اعمال كتير اونلاين و حيديك خلاصة تجربته في السنين دي باذن الله.

1# كيف اصبح مصمم جرافيكي و من أين البداية؟

أهم ما في البداية انو يكون عندك الرغبة اولا الشديدة في المجال و تحب المجال جدا. أكيد ما نستثنى انك يكون هدفك مادي برضو. و لكن المرحلة الاولى تكون عن قناعة و حب للمجال.

الحاجة الممكن تحصل لو انت حاولت تشتغل في المجال دا بدون شغف و حب انك ما حتتقدم بل حتكون فقط ممارس و يصعب عليك تصل الاحترافية فيه.

المسالة بسيطة جداً، عدم حب للمجال = ضعف في جودة تسليم الخدمة و دا = دخل مادي اقل !

طيب بغض النظر

انو تبداء بالممارسة الفعلية للمجال و بعد فترة بسيطة تبداء تاخد فلوس على شغلك و نهائيا ما تشتغل مجانا نهائيا

مع الوقت حتلاقي نفسك بتتطور و تزيد قيمة عملك من 1 دولار لحدي 1000 دولار و هكذا…

2# أهم الادوات و المصادر الممكن ابداء بيها التصميم

المصادر اول شي نقدر نقول المحتوى المجاني في موقع  يوتيوب Youtube 

لكن طبعا عيب المحتوى دا انو بكون موجود بشكل غير مرتب و غير مكتمل احيانا كثيرة لكن عموما للبدايات مفيد جدا

بعدها ابدا في الممارسة كتير فيه و منها حتعرف نفسك اكتر بتحب شنو في المجال دا

عشان تسرع عملية التعلم بعد دا ممكن تشوف دورات تعليمية و لو تكون مدفوعة من منصات التعليم اونلاين زي منصة يودمي Udemy

حاول اول ما تبداء تركز في الاساسيات اولا

تبدا اول شي بالالوان و بعدها الخطوط و بعدها انواع الشعارات و انواغ تصاميم السوشيل ميديا و غيرها

المقصود البحث عن المعلومات الصحيحة اولا و التنفيذ التنفيييذ التنفيييذ

بالنسبة للادوات فحاختصر ليك المشوار انو تبداء بي ادوبي اليستريتر من Adobe Illustrator

هو الافضل في تقديري و متكامل مع برامج ادوبي الاخري

طبعا في برنامج تاني اسمه كوريل درو Corel Draw 

أهم نقطة حابي انبه ليها تاني … ما تتعلم الادوات اولا ثم تتعلم التصميم لا لا

أتعلم التصميم أولا بعدها اتعلم استخدام الأدوات

عمل الاداة ممكن تتعلمه بسهولة يعني ساعة ممكن تكفيك تتعلمها و لكن فهم مبادئ التصميم هي الاساس

 

3# هل ابداء بدراسة المحتوى العربي اول ولا الاجنبي عشان اتعلم التصميم؟

 

المصمم بيبقى مصمم ما عبر الادوات الكتيرة لكن بيبقى مصمم لمن يعرف كيف يستخدم الاداة و دي بتحصل مع الممارسةعبد الله حسين

الصراحة المحتوى العربي قليل مقارنة بالاجنبي و لكن اذا كان صعب جدا عليك اللغة فلا باس ان تبداء بالمحتوى العربي

الفرق بين المحتويين انو في محتونا العربي توجه فكرة التعليم تتركز حول الادوات اكثر من فن التصميم نفسه

القصد احيانا من المحتوي الغربي او الانجليزي انو بيعملوا محتوى كتير مرات فقط للتعليم و هدفهم التعليم

في المحتوى العربي عشان تلقى شي جيد غالبا تحتاج تشتري دورات اما شخيصة أو من منصة تعليمية

في اختلافات ايضا جوهرية في ثقافة و فن الغرب مقابل العرب

يعني المحتوى الغربي غالبا تصميماته بسيطة و غير معقدة و لا تستخدم الوان كثيرة لكن طبعا الاخوة العرب كثير منهم خاصة العملاء المبتدئين بحبوا الالوان كثير و تعقيد فكرة الشعارات و التصاميم عموما

بعدين باذن الله في سوق العمل مرات كتيرة حتلقى نفسك بتعمل شعارات لعملاء و انت ما راضي عنها لانها ما بتتوافق مع قواعد التصميم بسبب اختلاف ثقافة العميل و توجهه. لكن نعمل شنو بس

سددوا و قاربوا

عشان تفهم ليه مرات العميل بكون مصر على رائية بدون سبب و هو ما عنده خبرة تصميم بنصحك تقراء مقال الانحراف المعرفي تأثير دانينج كروجر 

4# ما هي اسواق بيع الخدمات التى تنصح بها للمصمم حتى يكسب فلوس؟

طبعا انت كمبتدي ما تفكر في الفلوس كثيرا اولا

حاول تعمل كمية كبيرة من الاعمال تستفيد منها مهنيا و تتعلم منها الاتي

أول شي، تظبط مهارتك جدا في التنفيذ

تاني شي، تتعلم كيفية التواصل مع العملاء و جزبهم لي اعمالك

تالت شي، تكون كونت بروفايل بتاع اعمال احترافية تقدر تسوق بيها لمشاريعة الجاية ان شاء الله

و غير كدا كتير طبعا …

يلا كفاية تنظير بعد دا ، اهم سوقين معروفين طبعا للخدمات المصغرة موقع خمسات Khamsat و الموقع الاصلي الاسمه فايفر Fiverr

اسعار الخدمات في المواقع دي بيبداء من 5 دولار و ممكن تزيد طبعا سعر الخدمة لاكتر من كدا لكن دي بداية التسعير

و بسبب السعر البسيط دا كتير جدا من العملاء بيستهدفوا الموقع دا فان شاء الله بسهولة كبيرة تقدر تلقى عملاء عليهم

طبعا مهم جدا انك تبني البروفايل بتاعك في المنصتين ديل. اتاكد انو تكتب بروفايل جاذب عن الخدمة البتقدمها و اتاكد تخت عدد من اهم اعمالك العملتها طبعا بنفسك عشان الناس يشوفوا شغلك قبل يتواصلوا معاك

بعدها في منصات لمحترفين اكتر و اسعار الخدمات المقدمة فيها اعلى زي منصة مشتقل العربية Mostaql و يكافئها منصة فريلانسر الاجنبية Freelancer

المنصات دي ممكن تعمل فيها مشاريع اكبر و قروشها اكتر شديد يعني عادي ممكن يكون مشروع بي 500 دولار الف دولار او حتى 5 الف دولار و هكذا حسب تعقيد المشروع و حجمة

طبعا لحدي ما تصل المرحلة دي لازم تكون برضوا بنيت ليك قاعدة بيانات بتاعت عملاء من شغلك القديم

و الناس بتوصي بعضها بيك لو شغلك عجبهم و كان احترافي و ظابط

برضوا حتسوق لي نفسك بعد دا عبر صفحاتك في المديا عموما و موقعك الخاص لو احتاج الامر و تخت اعمالك في مواقع عالمية

عموما الطريق و الرحلة بتتضح ليك اكتر اثناء المسير .. انت عليك تبدا الخطوة الاولى و أهم شي تبداها صح 

5# كيف أُقيم عملي كمصمم للشعارات و البراندات

في حلقة بودكاست ركن نقاش مع الاخ المصمم عبد الله عملنا حاجة جميلة

عبد الله عمل مراجعة و تقييم لي اللوقوهات العملها زمان من اول ايامه و قارن بينها و بين الشعارات الجديدة العملها و ورانا الفرق ممكن يكون شنو

شوف من الدقيقة 33 في فيديو عن كيف اصبح مصمم جرافيكي ، اضغط الرابط و شوف كيف عبد الله عمل التقييم

ممكن تشوف البروفايل حق عبد الله في موقع بيهانس العالمي على الرابط دا

أيضا رابط خدمة المصمم عبد الله حسين على خمسات

6# خطوات عملية على برنامج اليستريتور العشق الممنوع للمصممين!

عملنا لك توضيح بسيط و سريع على برنامج اليستريتور على الفيديو و يبدا من الدقيقة 50.

طبعا في ناس بتحب الفتوشوب اكثر من اليستريتور و لكن في الغالب بيكون تخصصهم تصاميم سوشيل ميديا و غيرها

ما بكون شغلهم كتير في الشعارات و الهويات البصرية و المطبوعات  مثلا

و في الاخير يبقى الاساس في تقديرنا للمصمم هو اليستريتور

الخص ليك الزيت بتاع ادوات اليستريتور عشان تبداء ببساطة

الادوات المهمة هي:

أداة الاختيار selection العادية و بتحدد عبرها نقاط معينة في الشعار مثلا

أداة البن توول Pen Tool بتتساعدك في الرسم و لكن احيانا ممكن تصعب  عليك شوية و تعمل بسببها اخطاء عشان كدا كتير من المصممين بفضلوا يرسموا الاشكال رسم او بطرق اخرى ابداعية

و غالبا المصمميم المهرة ما بيستخدموا البن تول و يبدلوه بادة القلم ال pencil مباشرة و بكون عندهم لوجة رسم و البرنامج بيعالجها لهم

ايضا تحتاج تستخدم اداة الدايركت سليكشن Direct selection

تحتاج تستخدم الأشكال الهندسية الموجودة في البرنامج

أداة التفريغ ايضا و دي بتساعدك على تفريغ المحتويات و تجعليها مقصوصة كما تحب

و اخيرا اداة الخط و دي كلها

7# أدوات هاردوير مطلوب المصصم يشتريها

طيب انت لانك عندك عشق في المجال دا اكيد همك حيكون انو تشتري افضل و احدث اداة تساعدك في شغلك

طبعا تاب الجرافيك هنا هو موضوع الحديث الاهم

بس انتبه

ما تتسرع و تشتري طوالي من الاول و من البداية بدون فهم

الادوات الرخيصة المستوردة من الصين و تقليد بكون غير دقيقة و تتعبك اكثر. يعني مثلا اداة تلقاها بي $30 و لكن تكون عيوبها بكون بيفوت و انت بترسم ما بكون دقيق او القلم يفصل او الملمس ما قريب للطبيعي

غالبا الادوات الجيدة بيبدا سعرها من $100 دولار و انت طالع و لكن انت كمبتدي ما حتحتاج التاب دا في الاول لانو طلبات العملاء ممكن ما ترقى للتعقيد البحوجك ليهو

فانا بنصح انو تصبر و تشتغل بالمتوفر عندك لحدي ما تشتري اكثر تاب مناسب و الاعلى جودة

بالنسبة للتاب فعموما ارشح لك شراء احد تابات شركة ويكوم من هنا أضغط الرابط

8# التايبوغرافي و الخطوط العربية

في مشاكل بسيطة تواجه المصمميم في الخطوط العربية و اهمها طبعا هي انو عدد الخطوط و توفرها اقل من الخطوط اللاتينية

بروضوا من المشاكل انو الخط بيكون في منه سمك واحد فقط عادة و ليس ثلاثة و دا بخليك ما تعمل براند متاكمل و بناء هوية بصرية بسهولة

الحلول بقت انو بيتم ابتكار خطوط جديدة و طبعا تعتمد على الرسم اكتر من الخط في الكتابة

طبعا اذا ما عندك موهبة الخط العربي او ما مهتم بها فما ضروري تركز في مجال التايبوغرافي العربي

9# أكتساح سوق العمل و كيفية الحصول على عملاء و شغل

ذي ما كلمتك اول حاجة في استراتيجيتين ممكن تتبعهم

الاولى انك تركز على القروش و العمل السريع و ما تطور من نفسك و من البداية يكون هدفك القروش بس

و دي بتمشي لكن ما بتتقدم فيها كويس لانو اذا ما اتطورتا ما حتعلي جودة الخدمة و بالتالي ما حيعلى المستحق المادي مع الزمن

فاحسن ليك الطريقة التانية انك تركز على ارضاء العملاء و التعلم لفترة طويلة

الزباين كتار و بعد تسجل و تخت بروفايلك في عدد من المنصات بتاعت الخدمات ممكن يجيك عملاء عادي

اخونا المصمم الخطير عبد الله قدر يتحصل على عدد مقدر من الزبائن خلال 3 شهور فقط و انت كذلك ممكن تعمل اكتر او اقل من  كدا حسب اجتهادك

انصحك تاني بشي مهم جدا جدا جددددا

انو تحاول تتخصص في نوع معين من التصميم و تتقنه كثيرا و يكون الاستايل بتاعك فيهو فريد

دا حيخليك وجهة لنوعية معينة و محددة من العملاء بكونوا عاوزين شغل باستايل معين و عارفين نفسهم عاوزين شنو

و ما عندهم مانع يدفعوا اكتر مقابل الخدمة الاحترافية

في مرحلة أكبر و احسن طبعا و هي انك تبداء تسوق لخدمتك عبر الاعلانات المدفوعة و تستهدف الفئات الممكن تكون مهتمة بتصميماتك و شغلك

10# تنظيم الوقت في عمل التصميم و الديزاين

اول ما تبدأ شغل حتكون متحمس جدا و عاوز تنجز كتير كتير شغل

و مع زحمة العملاء و الشغل حتكون مدي اغلب الوقت للعمل و التنفيذ

لكن اتذكر انو انت انسان و في فترة ممكن تجي حتحس فيها بي ملل و تعب، عشان كدا لازم تنظم وقتك

خلي عندك وقت للتسويق للعملاء الجدد و التواصل مع العملاء القديمين

و وقت اخر للعمل على المشاريع نفسها

و وقت لتطوير نفسك و مواصلة رحلة التعليم و الابداع في مجال الديزاين

ما حقدر اديك طريقة معينة لانو كل شخص عنده سلوكه الخاص و ترتيباته بس عموما تقسيم الوقت حيفيدك كتير جدا جدا

أنا ما بعمل اكتر من عدد ساعات معين في اليوم عشان ما اخرب مزاجي و اكون مضغوط و ما اقدر ابدع في التصميم و الديزاين
عبد الله حسين

خاتمة و ملخص

قبل ما نختم في حاجة اخيرة و هي تسعير الخدمات بتعتك

و دا سهل من ناحية و صعب من ناحية تانية

الجانب السهل فيها انو ممكن تحسب تكاليف عملك مبدئيا، مثلا البرنامج الذي تعمل عليه كم يكلف و الادوات التي تستخدمها و فواتير الانترنت و الاتصال و الكهرباء و غيرها

اما الجانب الصعب في التقييم فدا بيعتمد عليك انت نفسك

و دا انت ممكن تقارن نفسك مع السوق و تبداء كمبتدي تعطي نفسك سعر بسيط في الاول

بعد توصل مراحل اكثر من التصميم انت حتعرف تقييم نفسك وقتها بنفسك و تعرف تقديرا كم قيمة الابداع اللي بتعمله إن شاء الله

و في الختام احب الخص ليك مجمل الطريق انو اول شي لازم يكون عندك الشغف و بعدها تبدا تتعلم التصميم وليس الادوات

و من ثم تبدا في التنفيذ ثم التسويق و في الطريق تتخصص في شي معين اكتر و تركز فيه

توكل على الله

بارك الله فيك و لا تنسانا من صالح الدعوات